Thursday, October 26, 2017

රසඥ මනසෙන් චිත්‍ර අඳින්න, තාර්කික මනසෙන් ජීවත් වෙන්න.





ඔබට නිවැරදිව වීදුරුවක් අඳින්න පුලුවන්ද?

නිවැරදිව වීදුරුවක් අඳින්න රසඥ මනසට පුලුවන්.
තාර්කික මනසට නිවැරදිව වීදුරුවක් අඳින්න බැහැ.

මේසයක් උඩ ඇති වීදුරුවක් දකින කෙනෙක්
එහි මුව දකින්නේ ඕවලාකාර හැඩයක් ලෙසය.
එහෙත් ඔහුගේ තාර්කික මනස ක්‍රියාකරමින්
ඒ හැඩය වෘතයක් බව ඔහුට හඟවයි.

ඔහුට වෘතයක් අඳින්නට අවශ්‍ය වුණොත්
වීදුරුවේ මුව තබා ඒ වටා පෑන ගෙන ගොස්
නිවැරදිව වෘතය ඇඳ ගත හැකි බව
ඔහු ආයාසයෙන් සිතිය යුතු නැත.

ඔහු අඳින වෘතය ඉදිරියෙන් සිට
හරියටම ලම්බකව නොබැලුවොත්
වෘතය වෙනුවට  ඔහු දකින්නේ ඕවලයකි.

ත්‍රිමාණ දර්ශන සංශෝධනය කරමින්
ද්විමාන තොරතුරු ලබාදෙන තාර්කික මනස වන
මිනිස් මොළයෙ වම් පැත්තී ක්‍රියාකාරිත්වය නිසා
බොහෝ දෙනෙකුට වීදුරුවක් ඇඳ ගැනීම
නිතරම වරදින කාර්යයකි.
වීදුරුවක් දෙස බලා ඇන්දත්
තර්කයෙන් අඳින වීදුරුවේ මුව වෘතයකි.
වීදුරුවේ පතුල සරල රේඛාවකි.

කිසිම කෙනෙක් කොතරම් වීදුරුව හරවමින්
කෝණ කීයකින්, කොතරම් බැලුවත්
වෘතාකාර මුවත් සරල රේඛීය පතුලත්
දෙකම එක වර දැකිය නොහැක.
වෘතාකාර මුවත් සරල රේඛීය පතුලත් පෙනෙන්නේ
වෙනස්ම කෝණ දෙකකින් බලන විටය

රසඥ මනසින් ක්‍රියා කරන
චිත්‍ර ශිල්පියා වීදුරුව අඳින්නේ
ඔහු දකින ඕවලාකාර මුව සහ
ඊට වඩා ටිකක් ලොකු ඕවලයකින්
අඩක් පෙනෙන පතුලක් සහිතවයි.
ඒ ඔහුගේ ඇසට පෙනෙන සැබෑ රුවයි.
ඔහුගේ තාර්කික මනස නිහඬය.
ජ්‍යාමිතික දැනුම අකර්මණ්‍ය වූ
ඔහුගේ රසඥ මනස තමන් දකින දේ
ඒ අයුරින්ම චිත්‍රයට නගයි.

සැබෑ ද්‍රව්‍ය බලා චිත්‍ර අඳින තුරු
චිත්‍ර ශිල්පියෙකුගේ චිත්‍ර වලින්
සත්‍යයත් ජීවයත් කාන්දු වන්නේ නැත.
ඔහුගේ ඇස දකින සැබෑ දාර්ශනික ලෝකය
මනසින් දකින දාර්ශනික ලෝකය නොවේ.
මේ කඩුල්ල පනින තුරු ඔහු අසම්පූර්ණය.

වීඩියෝ ආදර්ශයෙහි පෙනෙන අයුරින්
ද්විමාන තලයක ''එකම ප්‍රමාණයෙන්'' යුතු
මෝටර් රථ දෙකක ආදර්ශ රූප දෙක
ත්‍රිමාණ පසු බිමක යෙදූ විට
තාර්කික මනස අවුල් වන ආකාරයේ රුවක්
අප හමුවේ මැවෙන්නේය.

පහළින් ඇති රියට සාපේක්ෂව ඉහළින් ඇති රිය
විශාල යැයි තර්කයෙන් නිගමනය කරයි.

ද්විමාන තලයේ රූපවල වෙනසක් නැත.

ත්‍රිමාණ දර්ශන සංශෝධනය කරමින්
ද්විමාන තොරතුරු ලබාදෙන තාර්කික මනස
රූපවල සමානත්වය දකින්නට
පසුබිමෙන් කරන බලපෑමට යටත්ව
ද්විමාන තලයේ වෙනසක් නැතත්
වෙනසක් දකිමින් මුලා වෙයි.

ද්විමාන තලයෙහි
සත්‍යය ඒ අයුරින්ම පෙනෙන්නේ
රූප දෙක සමාන නිසාය.
දැන් ද්විමාන තලයක සමාන රූප පවතියි.

ත්‍රිමාණ දර්ශණයක සමාන රූප වුවත්
පවතින තැනට සාපේක්ෂව ලැබෙන තොරතුරු
අපේ තාර්කික මනස රවටන්නට සමත් වෙයි.


මිනිස් මොළයෙ වම් පැත්ත සහ දකුණු පැත්ත
එකඟ නොවෙන තවත් දර්ශනයක් මේ.

සැබෑ දර්ශනයකදි අපි ඇසින් දකින දේ
අපේ බුද්ධියෙන් දන්න දේ නොවෙයි.

ඒ රූපම ගඩොල් බිත්තියෙ ද්විමාන තලය මත
ඒ තලයට සාපේක්ෂව වෙනසක් නොපෙන්වයි.

චිත්‍ර ශිල්පයේදී බාධාවක් වන නමුදු
ඇසට පෙනෙන විකෘති රූපය මාර්ගයෙන්
සත්‍ය රූපය සොයා ගැනීම නැතිව
එදිනෙදා ජීවිතය ගත කළ නොහැක.
රසඥ ඇසට කවර හැඩයකින් පෙණුනත්
තාර්කික මනසේ රූප සංස්කරණයෙන්
අපි ඒ රූප නිවැරදිව දකිමු.

අඩි විස්සක පාරක් පනින්නට යන මගියෙකුට
පාරේ පළල ලෙස අඩි විස්සක් නොපෙනෙයි.
පාරේ අනෙක් පස ඇති අඩි විස්සේ කණුව
ඒ ප්‍රමාණයටම පෙනෙන නමුත්
ඇසට රූප වැටෙන කෝණ වලට සාපේක්ෂව
පාර ඔහු දකින්නේ අඩි ස්වල්පයක් මෙනි.

මේ අවස්ථාවේදී තාර්කික මනස විසින්
මේ දුර දෙකම සමාන බව පහදා දෙයි.
මේ හැකියාව නැති නම් පාරේ ගමන් කරන
වාහන දෙකකට මාරු වීමද අසීරුය.

චිත්‍ර ශිල්පයේදී බොහෝ දෙනෙක්
තමන්ට චිත්‍ර ඇඳීමට නොහැකියයි සිතන්නේ
මේ තාර්කික මනසේ සංස්කරණය නවත්වා
රසඥ මනසින් ඇඳීමට නොහැකි වීමයි.

සැබෑ ද්‍රව්‍ය සහ මිනිස් රූප
බලා අඳින්නට සිසුන් හුරු කරන
දක්ෂ ගුරුවරයෙකුගේ මග පෙන්වීමන්
මේ අපහසුව මගහරවා ගත හැක.

 

 

 



 

 


මිනිස් සිරුරේ ඇට සැකිල්ල,
පේශි ආදිය උගන්වන පොත් සහ
රිද්මය, සමබර බව ආදිය උගන්වන
පොත් අති විශාල සංඛ්‍යාවක්
අන්තර්ජාලයෙන් සොයාගත හැක.
නොමිලේම බාගත කරගෙන
මිනිස් සිරුර හොඳින් හදාරන්න.










Download Free Art Books
===========================================
චිත්‍ර අඳින්න, ගීත, කවි, කතා ලියන්න
අපි මොළයේ දකුණු පැත්තට බරවෙමින්
රසඥ මනස පුබුදුවා ගනිමු..

ඒ අවස්ථාවේදී තාර්කික මනස
එනම් මොළයේ වම් පැත්ත තර්ක මතු කළොත්
අපට කලාත්මක නිර්මාණ කරන්න නොහැකි වෙයි..

විද්‍යාවෙදි ස්වාමියා බවට පත්වෙන බුද්ධිය
කලාවෙදි වහලෙක් කරගන්න කලාකරුවා පෙළඹෙයි.

"සඳ එළියෙන් බැහැ මැණිකේ මැණිකෙගෙ ලස්සන බලන්න
පැලට ගිහින් පැල ඇතුලේ කුප්පි ලාම්පුව නිවන්න."
ප්‍රේමකීර්තිගෙ මේ පද දෙක
බුද්ධියෙන් විග්‍රහ කරන්න නම්
මොළයට හත් ගව්වක් ගියත්
සාර්ථක තර්කයක් නෑ..

හදවතින් විඳින්න එක පියවරක් ඇති.